KABLAAWAK manen dagiti dadaulo ken tumultulong iti San Esteban Circle of California gapu iti anep ken tarigagayda a mangitag-ay iti pannakataginayon kadagiti inyusuat ti gunglo nga iringpas.

          Iti kaaddan ti pakasaritaan daytoy iti website, agpaay ngarud a nakananama a puon ti ubbog a mangparegta kadagiti Ilokano nangruna dagiti taga – San Esteban, ditoy tapno maaddaantayo iti bileg ken inspirasion a mangtun-oy kadagiti ambisiontayo iti biag.

          Iti unos ti kaadda ti pulitayo iti America, maymaysa ti panggep ti liderato dagiti nadumaduma a gunglo dagiti Filipino a gun-oden; ti panagkaykaysatayo tapno maaddantayo iti sangi a mangirupir iti kalintegantayo kas imigrante. Ta adu dagiti parikut a samirentayo iti panagbiagtayo ditoy ken no dadduma mangipaayda iti upay iti panakilangentayo iti sabali a puli iti agdama a kagimongan.

          Namnamaek a babaen ti pannarabay dagiti agdama nga ipisiales ti SECC, maisupusop la ketdi ti gunglo iti tunggal Ilokano ditoy ti kaipapanan ti panagkaykaysa kas iti padas dagiti bannuar a Filipino.

          Idi irupir dagito tallo a padi a Filipino (da Padre Burgos, Gomez ken Zamora) ti pannakaited ti patas a bileg dagiti Puraw ken Filipino a padi ken pannakaguped ti racial discriminiation, nayurit ti anag dagitoy a kiddaw kadagiti kailian a nagriing kadakuada nga umalsa. Ket daytoy koma nga anag ti mangsukog ken mangtimon met iti konsensia ti tunggal Filipino, ti tunggal Ilokano ditoy, tapno maaddantayo met iti simbeng ken urnos a mangidarirag kadagiti kalintegantayo iti agdama a kagimongan iti America. Kasapulantayo met ti nailian a konsensia ditoy a magrisut kadagiti national issues kas iti imigrasion ken human rights a pakaibiangan ti pulitayo.

          Marukod ti kaipapanan ti maysa a historic event babaen ti essem dagiti umili a mailimog itoy a pasken. Napaliiw daytoy a pulso dagiti Filipino iti umuna a people’s revelotion, ti EDSA People Power Revolution idi 1986. Maysa a kinabaknang (historical wealth) iti pulitayo daytoy a rebbengna a maitukit iti lagiptayo to ti anagna ipaayna ti kalidad ti panagbiagtayo. Kasta met nga agpaay koma daytoy a padas dagiti Filipino a pakdaar iti asino man a puli a mangpadas a mangikuspil kadatayo ken agpaay pay a talukatik a mangparidam ken mangpairut iti urnostay.